Kommunepolitikk,Politikk

Mange saker skal opp i hovudutvala denne veka

Denne veka startar politikken for alvor i Tromsø etter valet. Her er ein gjennomgang av nokre av sakene som skal opp.

Det er møter i alle hovudutvala denne veka. Det startar med Hele- og velferdsutvalet på måndag, byutvikling på tysdag, kultur- idrett og friluftsliv på onsdag, klima-,miljø- og samferdsel på torsdag. Veka blir avslutta med møte i hovudutval for oppvekst og utdanning på fredag.

Du finn alle sakspapira til desse møta på Tromsø kommune sine nettsider.

Økonomirapport 2 -2019

Det er ei sak du finn i alle hovudutvala. Det er økonomirapport 2. Dette er ei statusoppdatering av korleis det går med økonomien i Tromsø kommune. Rapporten viser at Tromsø kommune ligg an til eit overforbruk på 67,4 millionar. Det er 150 millionar betre enn prognosen var i fjor og 60 millionar betre enn prognosen i økonomirapport 1 i år. Det betyr likevel at dersom dette slår til vil vi ha brukt opp så godt som alle sparepengane våre i kommunen. Det blir ein utfordrande haust og eit utfordrande år i 2020.

Du kan lese heile økonomirapport 2 her.

Brann og redning

Det er mykje som handlar om økonomi – dessverre. I byutviklingskomiteen skal dei ha ei sak om økonomien i brann og redning. Du kan lese saka her. Saka viser at også her slit dei med å halde budsjetta.

Administrasjonen skriv i saksframlegget:

For å komme innenfor gitte rammer etter vedtak av Øk.rap. 1 mai 2019, må Tromsø brann og redning redusere kostnader i form av tjenestekutt og mulig reduksjon i årsverk. Vedtatt brannordning (K-styresak 132/18) vil ikke kunne oppfylles.

Korleis vi skal klare å unngå dette i dagens økonomiske situasjon, veit ikkje eg per no. Samstundes er det jo ingen som ønsker å redusere på brannberedskapen vår. Gode innspel tar eg mot med takk.

Rektor Qvigstadsgate

Byutvikling har og ei interessant sak om reguleringsendring på den tomta som ligg ved sida av Villa Eidsvold. Det er eit område som i dag er regulert til offentleg formål, men som eigaren no vil omregulere til bustadføremål. På den eine sida er eg skeptisk til å regulere om frå offentleg formål til bustadformål. Vi har ikkje mange stader i sentralt i Tromsø som er tilgjengeleg for å bygge for offentleg formål. I dag fungerer området og som friområde i bydelen. Samstundes treng jo Tromsø fleire hus, gjerne sentralt for å redusere transportbehovet. Men på den andre sida blir dette fort dyre bustader.

I utgangspunktet hellar eg mot at det blir feil å godta denne reguleringsendringa, men er open for innspel og idear.

Du kan lese saka her.

Planprogram for Mack

Byutviklingsutvalet skal og diskutere planprogrammet for Mack-tomta. Her er det mange spennande planar som no skal utgreiast. I eit planprogram fastset kommunen kva tema som skal utgreiast. Her er utbyggar og kommuneadministrasjonen blir samde om tre tema som skal greiast ut. Men ikkje blitt samde om det fjerde temaet.

Administrasjonen skriv i saksframlegget:

Forslagstiller og administrasjonen har etter diskusjoner rundt utbyggingsalternativene ikke kommet fram til en felles forståelse av hvilke alternativer som skal utredes. Det er ikke enighet om alternativet uten bebyggelse på østsiden av Macktomta og Sørtomta

Eg er samd med administrasjonen om at det må greiast ut korleis alternativet der Sørsjeteen blir park/offentleg byrom

Du kan lese saka her.

I kulturutvalet er det i alle fall to interessante saker denne gongen.

Normalhall Storelva

Som du kanskje har sett i media blir den nye hallen på Storelva dyrare enn vi hadde sett for oss. No har vi fått inn anbuda, og kostnaden ser ut til å komme på 145 millionar, 39,5 millionar meir enn vi trudde.

Her meiner eg at vi berre får lukke auga og peise på. Vi treng ein ny hall på Storelva og skolen treng ein gymsal.

Du kan lese saka her.

Tromsø kunstforening

Administrasjonen foreslår i denne saka å selge dette bygget til Universitetet. Dette er ei vanskeleg sak for kommunene, og eg veit og at det er ulike meiningar i SV om denne saka. Eg tenkjer at kommunen ikkje har dei pengane vi treng til å sette dette bygget i stand på ein god måte. Administrasjonen anslår at det vil koste 20 millionar å sette bygget i stand. Samstundes er det vel liten tvil om at når ein tar til å jobbe på slike gamle bygg så oppdagar ein ofte nye ting som må ordnast. Eg ser det ikkje som usannsynleg at kostnaden vil bli høgare.

Men, kommunen har eit stort ansvar for å sikre at dei som i dag brukar bygget får gode alternativ dersom vi skal selge. Både kunstforeninga og dei kunstnarane som har atelier der må få minst like gode tilhøve som i dag dersom det skal vere aktuelt å selge.

Eg tenkjer og at det kan bli eit interessant samspel mellom dagens Musegata 2, universitetsmuseet og Akademi for kunstfag. Administrasjonen skriv i saksframlegget sitt:

Dersom bygget selges til UiT, opplyses det at formålet er at bygget skal benyttes til kulturvirksomhet, nærmere angitt som «virksomhet i regi av Norges arktiske universitetsmuseum og akademi for kunstfag (UMAK), og til samarbeidsprosjekter mellom UMAK og kulturlivet i Tromsø. Bygget vil romme utstillinger og andre aktiviteter som vil være tilgjengelige for allmenheten

Min konklusjon om at det er rett å selge føreset at vi finn gode alternativ for dei som i dag brukar bygget.

Du kan lese saka her.

Forøvrig tenker eg det er artig at Tromsø kan bli ein syngande kommune. Men det er lurt for alle om eg slepp å synge.

Ny ressurstildelingsmodell for skolane

I oppvekstutvalet skal dei handsame ei sak om ny måte å tildele ressursar til skolane i Tromsø. Slik eg har oppfatta det er dei fleste samde om at dagens modell ikkje er god. Den er vanskeleg å forstå og vanskeleg å bruke for skolane. Spørsmålet er korleis den nye modellen slår ut.

Eit av dei vanskelege spørsmåla er om kor mykje pengar skal følgje elevane og kor mykje pengar skal skolane få uavhengig av elevtalet.

Det andre spørsmålet er om elevtalet er ein god målar av kostnaden ein skole har. For det første er det jo først og fremst talet på lærarar som avgjer kva det kostar å drive ein skole. Elevane må jo ha ein lærar om det er to elevar i ei gruppe eller om det er 13 elevar i ei gruppe.

Det tredje spørsmålet som ikkje er godt nok besvart er korleis vi skal handtere at ein lærar ikkje kostar det same uansett. Både ansiennitet og utdanning har jo betydning for lærarløna. Det blir ikkje tatt høgde for i ein modell der elevtalet betyr mykje.

Du kan lese saka her, og kom svært gjerne med innspel.

OK, denne saka vart svært lang, men det er no eit forsøk på vise fram nokre av dei sakene vi balar med. Kom gjerne med dine spørsmål eller innspel til dei sakene eg har omtalt, eller til ei av dei andre sakene som står på sakslista i veka som kjem.

Standard
Kommunepolitikk

No må du hjelpe meg litt med ein reguleringsplan på Hillesøya og med brann og redning

Kart henta frå saksdokumenta. Viser plasseringa av området.

Det er tett mellom møta for tida. Og allereie på torsdag er det nytt møte i byutviklingskomiteen. Der er det to saker eg synst er vanskeleg, og det hadde vore fint om du kunne hjelpe meg med idear og innspel.

Den første saka gjeld ei reguleringssak på Sommarøya. Her er eg i tvil fordi eg ikkje kjenner Sommarøy og Brensholmen så godt som eg burde gjere. Dette gjeld området du kjem til om du tar til venstre rett etter at du har kryssa brua over til Hillesøya og fortset forbi hotellet. Området er i dag regulert til hyttebygging med tvungen tilbakeleige til hotellet. Det er søkt om å omregulere området til fritidsbebyggelse for å kunne bygge hytter utan tvungen tilbakeleige til hotellet. Reelt sett er dette ei minimal endring, og burde kanskje vore uproblematisk. Det får berre betydning for dette med tilbakeleige til hotellet. Dei som søkjer grunngjev dette med endringar i marknaden. Likevel merknadane frå Hillesøy fiskarlag som er støtta av Brensholmen/Sommarøy utviklingslag seier blant anna:

Presset på boligområdene på Sommarøy er veldig stort, med vernevedtak og båndlegging i flere kategorier på områder som det er mulig å bygge på. Det skorter også på egnet areal til industri og næringsformål. I våre øyne vil denne planendringen føre til en ren privateid hytteby,i det som er tenkt å være næringsområde.

Hvis markedssituasjonen ikke tilsier lønnsom drift for hotell/overnatting på området, bør det frigis til andre aktører. Samt at de tillatelser og lovnader som er gitt ang. utvidelse av hotellets overnattingsmuligheter,trekkes tilbake av Tromsø kommune. Hvis Sommarøy Arctic hotells behov for ekstra overnattingsplasser ikke er større enn at de kan basere seg på at noen «frivillig» vil leie ut hytta si til hotellformål, bortfaller hele begrunnelsen for ytterlig utbygging

Så kva bør eg og SV gjere i denne saka? Kor stor er mangelen på næringsareal? Kan den mangelen løysast andre stader i Sommarøy/Brensholm-området? Eg er tilbøyeleg til å vere samd med Hillesøy fiskarlag, men vil gjerne høyre gode argument.

Den andre saka gjeld ny brannordning for Tromsø. Denne saka handlar om korleis vi skal dimensjonere Brann og Redning. Kor mange folk treng dei, kva utstyr treng dei og kva trening treng dei? Dette er ei sak som eg synst det er vanskeleg å skulle meine veldig mykje om som lekmann. Eg er ingen ekspert på verken brann eller redning og må i utgangspunktet stø meg på det administrasjonen skriv. Men, eg veit jo at det er fristande å ta i litt når ein lagar slike planar. Det hadde sjølvsagt vore fint med ein ny skumbil, men er det fint å ha, eller heilt naudsynt. Det synst eg er vanskeleg å vite. Så dersom det blant lesarane mine skulle vere nokon som kan mykje om dette temaet så vil eg svært gjerne høyre meiningar, innspel og kommentarar.

 

Sakslista forøvrig er slik som dette:

Saksnr Tittel Saksdok Behandling Vedlegg
0033/18 PLAN 1873 – DETALJREGULERING FOR SOMMARØY HYTTEFELT – ENDELIG VEDTAK Fremlegg Beh (1) Vedlegg(12)
0034/18 BRANNORDNING FOR TROMSØ KOMMUNE Fremlegg Beh (3) Vedlegg(3)
0035/18 MILJØMILLIONEN 2018- NYE KRITERIER FOR TILDELING AV MIDLER Fremlegg Vedlegg(2)
0036/18 ÅRSMELDING 2017 TROMSØ KOMMUNE Fremlegg Beh (6) Vedlegg(1)

Vil du få beskjed neste gong eg skriv på denne bloggen?

Skriv inn epostadressa di og trykk abonner

Standard
Troms og Tromsø

La oss bygge drivhus på Prostneset!

OK, det er sikkert ein vill ide, men hadde det ikkje vore ufatteleg kult med drivhus på Prosteneset? Ein grøn park med ute(inne)servering året rundt? Det er sikkert dyrt og vanskeleg, men i ein vinterby som Tromsø, der vinteren skiftar farge mellom kvit, grå og grønn og brun hadde det ikkje vore fantastisk med eit felles uterom i sentrum der plenen var grøn nesten heile året?

Det er ikkje mange dagar kvart år det verkeleg er kos å sitte ute i ein park i Tromsø. Kanskje burde vi unna oss eit felles offentleg uteareal som ikkje var prisgjeven humøret til vêrgudane? Bilde er henta frå forprosjektet til Prostneset Park.

Eg tenkjer ikkje på eit kjedeleg glasshus sånn som dei har i Bodø, men eit glasshus som gjev utsyn over sundet og fjella. Der vi kan ta av oss jakka allereie i mars, drikke ein kaffe medan ungane leikar, graset spirar og vi irriterer oss over at dei er litt for høglytte ved nabobordet. Kanskje spelar ungane  fotball, eller det skal ein kanskje ikkje gjere i glasshus? I alle fall klatrar dei i stativ og tre, spring på plenen og har det moro.  I drivhuset kunne det vore benkar, bord og sjakkspel. Alt det vi ønskar oss av ein park.

Eg prøvde å teikne ei skisse av korleis det kunne sjå ut, men eg er like flink til å teikne som ein skiftnøkkel er til å svømme, så eg har ikkje noko anna bilde av dette enn det som er i hovudet mitt. Men det er bra fint!

Eg aner ikkje om det er mogleg. Kan ein bygge så stort i glass? Vil snøen skape store problem? Blir det vanvittig dyrt? Eg aner ikkje, men kult for byen ville det blitt. Eg trur det ville vore noko som verkeleg trakk fleire til byen.

Standard
Kommunepolitikk

Nytt bustadprosjekt på Storelva – møte i byutviklingskomiteen

Utsnitt frå planforslaget som viser trafikkbildet.

På torsdag er det møte i byutviklingskomiteen. Denne gongen med ei ganske så overkommeleg saksliste. Eit nytt prosjekt på Storelva er den viktigaste saka.

Prosjektet opnar for 170 nye bustader på Storelva. Det er snakk om området nord for Storelvahallen og nedanfor Løvesvingen/Nermyra. Eg synst i utgangspunktet planen er mogleg å gå for. 170 budstader er innafor bustadkvota på Kvaløya og prosjektet er med på å realisere bussveg på Storelva.

Det er likevel fleire ting eg kunne tenkt meg innspel på før vi skal handsame planen. Først og fremst er det transportløysningane. Slik eg les planen er det lagt opp til vegar med fortau, der syklande ikkje blir skilt frå gåande eller køyrande. Det er ei løysning eg ikkje liker. I alle nye prosjekt vil eg gjerne ha sykkelveg med fortau, eller adskilte sykkelfelt. Det aukar stadig med syklistar, og mange syklar fort. Det er derfor viktig å skille dei som syklar og dei som går for å få trygge vegar. Når det gjeld desse tinga vil eg gjerne ha innspel frå folk som ferdast i området til vanleg.

Eg ser og at det er reaksjonar på høgda for delar av prosjektet, spesifikt frå eit burettslag i Nermyravegen. Det vil eg og gjerne ha innspel på.

Dersom nokon har innspel til dei andre sakene tar eg og mot med takk.

Sakene

PLAN 1861 – DETALJREGULERING FOR STORELVA, EIENDOM 71/753 Fremlegg  Vedlegg(26)
EVALUERING AV DAGENS ORDNING FOR BEHANDLING AV KLAGER I BYGGESAKER  Fremlegg 
FORBEDRINGSPROGRAMMET – RAPPORT 1 2018  Fremlegg  Vedlegg(1)
ØKONOMIRAPPORT 1 – 2018  Fremlegg  Vedlegg(1)

 

Standard
Kommunepolitikk,Politikk

Friluftstoalett i Grøtfjord og nokre klagesaker i neste møte i byutviklingskomiteen

oversiktbilde Grøtfjorden. Foto: Harald Groven/wikimediaDette møtet har ikkje mange nye saker. Dei aller fleste sakene er klagesaker. Gladsaka i dette møtet er sjølvsagt friluftstoalett i Grøtfjorden. Grøtfjorden er eit viktig utfartsområde i Tromsø. Mange kosar seg på den fine stranda på fine sommardagar. Når det er mange folk på lite plass så er det viktig med gode fasilitetar. Eg er kjempeglad for at vi no beveger oss nokre steg i rett retning og nærmar oss bygging av kommunale toalett. Til no har dei fasilitetane som er der vore drive nærmast på dugnad.

Ny kommunalteknisk norm er viktig, men ganske teknisk og litt vanskeleg gripe for ein lekmann. Her vil eg gjerne ha innspel. Det er eit punkt om innkjøpsreglar ol. som eg skal titte nærmare på for å sikre at dei er i samsvar med dei reglane vi har i kommunen og som skal sikre arbeidstakarrettar og gode innkjøp.

Når det gjeld klagesakene er utgangspunktet mitt at dersom det ikkje kjem nye moment i klagen skal det mykje til for å omgjere vedtak, også vedtak som eg er usamd i. Eg må likevel tenke litt på kva vi skal gjere med prosjektet i Vestregata. Eg var ikkje med på handsaminga i kommunestyret sist. Eg måtte gå for å vere med på eit arrangement på skolen til ungane mine etter å ha sjekka at stemmen min ikkje kom til å bli avgjerande i kommunestyret. Hadde eg vore der ville eg stemt mot reguleringsplanen, men ei klagesak er litt annleis. Dersom vi skal omgjere eit vedtak bør det vere nye fakta eller andre nye moment. Ein klage skal vanlegvis ikkje vere ein rein omkamp. Men, som sagt, eg er i tenkeboksen.

Mortensnessaka vedkjem jo nærområdet mitt, men eg synst administrasjonen har svara godt på klagene.

Dei andre klagesakene er eg innstilt på å avvise.

Den siste saka er meir indremedisin. Kva reglar skal vi som politikarar og kommunens administrasjon følgje? Det er ei sak innfor dette som kan vere relevant å diskutere i byutviklingskomiteen, og det er kven som skal avgjere klager på bygge- og delingssaker.

I dag blir desse avgjort i administrasjonen. Spørsmålet er om dette skal opp på politikarane sitt bord? Mange av sakene er reine regelforståingssaker og høyrer heime i fagadministrasjonen, men mange inneheld skjønnsvurderingar og dermed politikk. Dersom desse skal opp til politikarane så må vi og diskutere korleis vi sikrar likehandsaming av sakene. Eg er nok ikkje klar til å ta endeleg stilling til dette i komitemøtet. Dette skal vi nok diskutere meir internt i SV og med samarbeidspartia våre.

Eg tar gjerne mot innspel på alle sakene, anten i kommentarfeltet, på facebook eller i epost til pal.julius@skogholt.org

Saksliste med lenke til saksframlegga

Foto: Harald Groven/Wikimedia Commons

Få ein epost neste gong eg skriv på denne bloggen?

Skriv inn epostadressa di og trykk abonner

Standard