Kommunepolitikk,Politikk

Om meiningsmålingar, Hjort, men først og fremst neste kommunestyremøte

Eg må nesten starte med å fortelje om kor fornøyd eg er med meiningsmålinga i Nordlys her om dagen. 13,9% til SV og fram seks prosentpoeng frå sist kommuneval. Og med fare for å la optimismen ta heilt overhand så trur eg det er mogleg for SV å få 20% ved kommunevalet neste haust. Eg håper du vil vere med å bidra til å få det til.

Det einaste skåret i gleda, om eg kan seie det slik er at målinga viser at vi tre partia som styrer no mistar fleirtalet. Det trur eg likevel det er mogleg å gjere noko med. Dersom miljøpartiet vil samarbeide med oss manglar det berre tre mandat på fleirtal og det skal vi klare å gjere noko med i året som kjem! Også må eg innrømme at det er litt nedtur å bli forbigått av SV i Bergen og Trondheim på meiningsmålingane. Dei har begge hatt målingar på over 15%, men når valet kjem neste haust så skal vi bli beste SV-by – bank i bordet.

Den største politiske «nyheita» i Tromsø denne veka er at Jens Johan Hjort stiller som ordførarkandidat for Høgre. Det synst eg er hyggeleg, han er jo ein triveleg og velmeinande mann, og kan sikkert trekke nokre stemmer for Høgre. Men, når dei politiske debattane startar trur eg han vil oppdage at det ikkje er nok. Forøvrig synst eg Tor Arne Morskogen som er kommunestyrerepresentant for Høgre hadde den beste kommentaren til dette.

Nokre av dokker fekk kanskje med dokker at vi hadde ein ørliten budsjettlekasje her om dagen om at vi ikkje kjem til å gjere som administrasjonssjefen foreslår å sette opp avgifta for kremasjon frå 0 til 2500,- kroner. Det avstedkom denne kommentaren frå Morskogen:

Eg kan i alle fall love at kremering av ordførarkandidatar ikkje blir ein del av valkampen.

Høgaste bustadblokka i Noreg

No er det ikkje alle saker SV, Ap og Raudt er samde om politikken. Eit eksempel på dette er Varden burettslag sitt forslag om å bygge den høgaste bustadblokka i Noreg på Varden. I utgangspunktet liker eg spillville idear, men denne er i villaste laget. Eg trur godt vi kan bygge høgt på Varden. Ti etasjar ville nok vore fint, men ei blokk som er så høg at den faktisk blir det høgaste punktet på Tromsøya er for valdsamt. Det er to hovudgrunnar til det. Det eine er at det vil endre landskapet og korleis denne øya vår blir sjåande ut, det andre er at eg er skeptisk til bumiljøet i ei slik blokk. Studiar viser at vi ser større grad av einsemd og andre problem blant dei som bur i høge hus. Så skal eg vere forsiktig å seie om det kjem av huset eller om det heng saman med kven som flyttar inn i slike høge hus. Uansett meiner eg at denne problematikken ikkje er utgreid godt nok i forslaget. Derfor stemte SV saman med Raudt mot å legge det planforslaget ut på høyring. Ap saman med høgresida stemte for. Eit sidepoeng her er at eg lurer på kva det vil koste kommunen å skaffe sløkkeutstyr for å handtere ein brann i ei slik høg blokk.

 

Kommunestyremøte i august

Komande onsdag er det kommunestyremøte i Tromsø. Det er ikkje all verden av spennande saker. Dette er sakslista:

Tittel Saksdok
INTERPELLASJON – OM NIQAB- OG BURKAFORBUD Framlegg
ELDRERÅDET 2018 – ÅRSMELDING FOR TROMSØ KOMMUNES ELDRERÅD 2017 Framlegg
ØKONOMISK INTERNKONTROLL – RAPPORTERING PR. 31-12.17 Framlegg
KONTROLLUTVALGSAK 55/18 – FORVALTNINGSREVISJONSRAPPORT «HÅNDTERING AV HENVENDELSER FRA INNBYGGERE» Framlegg
UTTALELSE FRA KONTROLLUTVALGET – ÅRSREGNSKAP 2017 FOR TROMSØ HAVN KF Framlegg
ØKONOMIRAPPORT 1 – 31. MARS 2018 – TROMSØ HAVN KF Framlegg
REGIONAL STRATEGISK NÆRINGSPLAN FOR TROMSØREGIONEN – VEDTAK AV PLAN Framlegg
PRIVAT FORSLAG OM INNFØRING AV OSLOMODELLEN Framlegg
PLAN 1843 – DETALJREGULERINGSPLAN FOR VESTREGATA 20/22 – KLAGEBEHANDLING Framlegg
PLAN 1848 – DETALJREGULERING RAMFJORD, BÆRBAKKEN – TIL ENDELIG VEDTAK Framlegg
PLAN 1783 – NEDRE VANGBERG, TIL VEDTAK Framlegg
EVALUERING AV BYGGEKOSTNADER FOR SKOLEBYGG Framlegg
STRATEGIER FOR SPESIELLE MILJØTILTAK I JORDBRUKET Framlegg
KUNST I OFFENTLIGE ROM OG BYGNINGER – OPPRETTELSE AV ET KUNSTFOND I TROMSØ KOMMUNE Framlegg
SØKNAD OM KOMMUNAL GARANTI – TROMSØ TENNISKLUBB Framlegg
VALG AV MEDDOMMERE 2017-2020 – OPPFØLGING AV VANDELSKONTROLL Framlegg
NYVALG OG SUPPLERINGSVALG SOM FØLGE AV FRITAK – INGRID MARIE KIELLAND OG KRISTINE MERETHE LARSEN Framlegg

Den første saka er ei rein markeringssak frå Frp. Det er vel etter kvart blitt brei semje i Noreg om at det å dekke til andletet på skolen eller i ein undervisningssituasjon – i alle fall på barne og ungdomsskolen – ikkje er bra. Når folk er blitt vaksne synst eg vi skal vere litt meir forsiktige med å bestemme kva klede dei skal ha på seg. Uansett, så langt så greitt, men å skulle vedta kva klede folk skal kunne ha på seg på skolevegen meiner eg er å gå for langt. Men, heilt overordna er dette eit ikkje-problem i Tromsø og for den del i Noreg. Så vidt eg veit har det aldri vore eit problem at førsteklassingar går med niqab eller burka langs skolevegen i Tromsø. Har du nokon gong sett det? Dette er rett å slett ein måte for Frp å signalisere til veljarane sine – hei vi er mot innvandring og islam sjølv om Per Sandberg reiser til Iran og lovprisar det undertrykkande regimet der.

Eg er glad for at saka om oslomodellen endeleg kjem opp i kommunestyret. Administrasjonssjefen er negativ til forslaget fordi ho meiner vi først må sette i verk dei 10 strategiske grepa mot arbeidslivskriminalitet som KS og NHO har utarbeidd før vi kan gå vidare. Eg ser ikkje noko motsetning mellom å gjennomføre desse grepa og samstundes skjerpe inn antal ledd med underkontraktørar det skal vere eller at det skal vere fleir elærlingar.

Vestregata 20/22 kjem opp nok ein gong som klagesak. Eg kjem til å stemme mot nok ein gong, men reguleringsplanen blir nok stadfesta. Eg meiner det er for høgt og vil øydelegge viktige siktlinjer mellom Kongeparken og Kirkeparken/Domkyrkja, men ingenting tyder på at fleirtalet er samde.

Det blir nok ein diskusjon å opprette eit kunstfond i Tromsø kommune. Nokre hevdar at dette er ein frivolitet vi ikkje har råd til, til det er det minst to ting å seie. 1. Sjølvsagt skal vi utsmykke kommunale bygg. Korleis hadde sjukeheimane og skolane våre sett ut med berre grå eller kvite veggar utan nokon form for utsmykking? 2. Dette gjer vi allereie i kvart einskild prosjekt. Dette er eit forsøk på systematisering og meir effektiv bruk av pengane. Så er eg litt skeptisk til administrasjonsutgiftane her. Det må vi titte nærmare på opp mot kommunestyremøtet.

 

Ok, dette vart meir enn langt nok, men kom gjerne med kommentarar og spørsmål så skal eg svare etter beste evne.

 

Standard
Troms og Tromsø

Kven skal få køyre først?

I dag er reglane for forkøyrsrett slik at der ein bilveg kryssar ein gang- og sykkelveg så er det syklistane som har vikeplikt. Tromsø kommune har eit prosjekt der desse reglane blir snudd. Der ein bilveg kryssar ein gang- og sykkelveg skal no bilane få vikeplikt. Det meiner eg heilt klart er eit framsteg. Eg skreiv litt om det i 2017 her.

Pål Julius Skogholt på einhjulssykkel

Det som i alle fall er heilt sikkert er om eg nokon sinne skulle få tulltak og komme på ein sykkel som dette på trafikkert veg så må eg håpe at alle viker langt unna.

Dersom vi skal klare å redusere veksten i biltrafikken, og det må vi både for klimaet si skyld og for å ha plass på vegane våre for dei som må køyre, så må vi sørge for at alternativa er raske, effektive og behaglege å bruke. Det betyr at vi må satse på å gjere det raskare, meir effektivt og meir behagleg å ta buss, å sykle og gå. Ein av måtane vi kan gjere det på er å sikre at der vi faktisk har infrastruktur for gåande og syklande. Infrastruktur som gjev dei som går og syklar ha fortrinnsrett. Gang- og sykkelvegane våre er ein slik plass. Derfor meiner eg at å gje dei som syklar forkøyrsrett når dei er på gang- og sykkelveg er eit godt tiltak. I tillegg er det slik at dei fleste bilvegar som kryssar ein gang- og sykkelveg er småvegar og avkøyringar der fartsgrensa er låg, det vil derfor ikkje vere noko stort tap i effektivitet for bilistane å måtte vike for dei som syklar.

Så er det sjølvsagt slik at det finst syklande idiotar, som det finst køyrande idiotar eller gåande idiotar for den del. Folk som skaper problem for dei dei deler vegen med. Uansett kva reglar vi har vil desse til tider skape problem. Men vi kan ikkje la det vere avgjerande for korleis vi bygger infrastrukturen vår. Og, ja det er til tider konfliktar mellom dei som går og dei som syklar. Mange syklar fort anten det er på vanleg sykkel eller el-sykkel. Det kan vere skremmande for dei som går i same vegbanen. Løysninga på det må bli at vi i Tromsø sluttar med det forelda konseptet gang- og sykkelvegar. Det vi treng er gode sykkelvegar med fortau som skil gåande og syklande. Det vil og vere sørgje for at færre syklistar bruker den vanlege vegbanen, som mange gjer i dag, for å unngå konfliktar med dei som går.

Kommentator i Nordlys, Tone Angell Jensen tar i eit innlegg og opp eit «problem» med at sykkelvegar vistnok skal ha betre vintervedlikehald enn fortau. Eg skulle nesten ønska at dette var eit faktisk problem. Dessverre har vi nesten ikkje dedikert infrastruktur til syklistane i Tromsø. Det einaste er vel sykkelbanane i vegen opp Kirkegårdsbakken og Storgatbakken. At dei blir brøyta samtidig med at resten av vegen blir brøyta kan då ikkje vere anna enn lurt?

Skal vi klare å løyse trafikkproblema i Tromsø må vi skape gode forhold for alle som går – og vi treng at fleire går. Vi må skape gode forhold for alle som syklar – og vi treng at fleire syklar heile året. Og vi må skape betre forhold for dei som tar bussen – og fleire må ta bussen. Då kjem vi ingen veg med å sette desse gruppene opp mot kvarandre.

Standard
Kommunepolitikk

Kostnadssprekk når kommunen bygger – neida, joda

Kø utanfor tvibit i samband med opninga

Tvibit er eit av bygga som kom inn på budsjett. Dette bildet er frå opninga. Foto: Tromsø kommune

Det er ikkje reint sjeldan at folk vil snakke med meg om ulike sider ved drift og politikk i Tromsø kommune. Det er heller ikkje reint sjeldan desse samtalane handlar om kor udugeleg kommunen er – kanskje spesielt når det gjeld å bygge ting. – Alt kommunen bygger går jo langt over budsjett!

Så eg bestemte meg for å sjekke litt. Vi har alle lest oppslaga i avisane om bygegsprekkane, særleg dei om Tromsøbadet. Men at eit bygg blir bygd på budsjett kjem sjeldan på framsida av avisane. Det er ikkje, og skal heller ikkje vere noko nyheit at ting går etter planen. Men det betyr at vi får eit skeivt bilde av tilstanden. Vi høyrer mest om det som går galt og lite om det som går bra.

Derfor sendte eg ein epost til administrasjonssjefen og spurte om ei oversikt over dei siste prosjekta til kommunen, og korleis det gjekk samanlika med budsjett. Dette er lista eg fekk:

KOMMUNENS BYGGEPROSJEKTER SISTE 4 ÅR; BUDSJETT, RESULTAT OG OVERTAKELSE:

Ersfjordbotn og selnes skole – 2017
Vedtak igangsetting:      70 millioner
Endelig kostnad:              69,4millioner
Overtagelsesdato           august 2017

Tromsdalen skole, moduler – 2017
Vedtak igangsetting:      27 millioner
Endelig kostnad:              25,8 millioner
Overtagelsesdato           august 2017

Trudvang Barnehage og -boliger – 2017
Vedtak igangsetting:      114,5 millioner
Endelig kostnad:              109,2 millioner
Overtagelsesdato           november 2017

Helsehuset – 2017
Vedtak igangsetting:      310 millioner
Endelig kostnad:              270,8 millioner
Overtagelsesdato           august 2017

Sommerlyst Skole – 2016
Vedtak igangsetting:      355 millioner
Endelig kostnad:              328,5 millioner
Overtagelsesdato           juni 2016

Sandnessund Krematorium – 2016
Vedtak igangsetting:      87,0 millioner
Endelig kostnad:              87,5 millioner
Overtagelsesdato           desember 2016

Nye Tvibit – 2016
Vedtak igangsetting:      105 millioner
Endelig kostnad:              104,2 millioner
Overtagelsesdato           mars 2016

Sommarøy Barnehage – 2015
Vedtak igangsetting:      31 millioner
Endelig kostnad:              31,2 millioner
Overtagelsesdato           juli 2015

 

Samla sett hadde desse prosjekta ei kostnadsramme på 1 milliard og 99,5 millionar. Medan den totale kostnaden kom på 1,0266 milliardar, altså 72,9 millionar under budsjett.

Dette betyr ikkje at eg ikkje ser alvorleg på overforbruket på Tromsøbadet og andre prosjekt, men at vi som så ofte elles må nyansere litt. Ofte, ja kanskje til og med i hovudsak så bygger kommunen på eller under budsjett.

Også skal eg ta eit ørlite atterhald til slutt. Eg har ikkje gått inn og sjekka om budsjetta er endra mange gonger undervegs i desse prosjekta.

Vil du få beskjed neste gong eg skriv på denne bloggen?

Skriv inn epostadressa di og trykk abonner

Standard
Kommunepolitikk

Skolekretsgrenser til besvær

Korleis skal vi best gje alle ungane i Tromsø eit godt skoletilbod, det er eigentleg grunnspørsmålet. Også nå vi skal vurdere skolekretsgrensene. Det er mange vanskelege avvegingar å gjere i ein slik debatt. Avstand til skolen, tradisjon, forventningar til skole etter kvar du bur og kvalitet på skolen.

Grønnåsen skole kan bli ungdomsskolen for elevane på Gyllenborg. Foto: Tromsø kommune.

Den grunnleggande utfordringa er at det over tid endrar seg kvar på Tromsøya det er flest elevar. Det endrar seg i takt med bustadbygginga og i takt med kva folk som bur i ein bydel. Når det blir bygd mykje nytt kjem det gjerne inn familiar med barn, etter kvart veks ungane til og det blir færre skoleelevar i eit område, også startar det gjerne på nytt.

På Tromsøya har vi nok plassar i ungdomsskolane våre til alle elevane. Dei tre ungdomsskolane Sommerlyst, Grønnåsen og Langnes er alle gode skolar. Skolar som vil gje ungane våre ei god utdanning, vere med å utvikle dei så dei kan bli det beste mennesket dei kan vere. Når det er slik at vi har plass til alle, ville det vore rart å skulle bygd ein ungdomsskole til. Ein ny ungdomsskole kostar fort ein halv milliard. Det er mange pengar å skulle bruke når vi allereie har plass.

For å kunne utnytte denne plassen vil det vere slik at elevar i nokre område i byen i periodar vil få lengre veg til skolen, men det er ikkje snakk om timesvis på bussen kvar dag. Vi vil vere innafor grei sykkelavstand for ein nokonlunde sprek fjortenåring uansett. Og alle som bur meir enn fire kilometer frå skolen får tilbod om buss.

Det store spørsmålet er derfor ikkje om vi skal endre skolekretsgrensene, men korleis vi skal gjere det. Kvar grensene skal gå må vi diskutere. Det som ligg fast er at nokre av dei som i dag soknar til Sommerlyst må gå anten på Grønnåsen eller på Langnes.

Administrasjonen har lagt fram eit forslag om at alle dei som i dag går på Gyllenborg barneskole i framtida skal gå på Grønnåsen (inntil demografien endrar seg og vi igjen må endre på grensene). Grunnen til det er at det er eit poeng å halde elevane samla. Det er ein tryggleik å vite at dei du gjekk på barneskolen saman med skal du og gå på ungdomsskole saman med.

Fleire moglegheiter

Det er likevel ikkje den einaste moglegheita. Dersom vi deler barneskolane kan vi lage skolekretsgrenser slik at ein del av dei som går på Gyllenborg, Fagereng eller andre barneskolar sør på øya skal gå anten på Grønnåsen eller Langnes. Det finst ikkje ein fasit på kva som er den beste løysninga. Eg ønsker velkommen ein debatt om dette, og gler meg til innspela frå foreldre og elevar på skolane om kva dei synst er den beste løysninga.

Det einaste eg er heilt sikker på er at med dei trass alt korte avstandane vi har på Tromsøya ville det vore feil bruk av fellesskapen sine pengar å bygge nytt når vi har plass til alle elevane. Den neste ungdomsskolen vil skal bygge i Tromsø kjem på Kvaløya. Der treng dei verkeleg ein ny ungdomsskole.

 

Du kan lese kommunens høyringsnotat om saka her.

Standard
Kommunepolitikk

No må du hjelpe meg litt med ein reguleringsplan på Hillesøya og med brann og redning

Kart henta frå saksdokumenta. Viser plasseringa av området.

Det er tett mellom møta for tida. Og allereie på torsdag er det nytt møte i byutviklingskomiteen. Der er det to saker eg synst er vanskeleg, og det hadde vore fint om du kunne hjelpe meg med idear og innspel.

Den første saka gjeld ei reguleringssak på Sommarøya. Her er eg i tvil fordi eg ikkje kjenner Sommarøy og Brensholmen så godt som eg burde gjere. Dette gjeld området du kjem til om du tar til venstre rett etter at du har kryssa brua over til Hillesøya og fortset forbi hotellet. Området er i dag regulert til hyttebygging med tvungen tilbakeleige til hotellet. Det er søkt om å omregulere området til fritidsbebyggelse for å kunne bygge hytter utan tvungen tilbakeleige til hotellet. Reelt sett er dette ei minimal endring, og burde kanskje vore uproblematisk. Det får berre betydning for dette med tilbakeleige til hotellet. Dei som søkjer grunngjev dette med endringar i marknaden. Likevel merknadane frå Hillesøy fiskarlag som er støtta av Brensholmen/Sommarøy utviklingslag seier blant anna:

Presset på boligområdene på Sommarøy er veldig stort, med vernevedtak og båndlegging i flere kategorier på områder som det er mulig å bygge på. Det skorter også på egnet areal til industri og næringsformål. I våre øyne vil denne planendringen føre til en ren privateid hytteby,i det som er tenkt å være næringsområde.

Hvis markedssituasjonen ikke tilsier lønnsom drift for hotell/overnatting på området, bør det frigis til andre aktører. Samt at de tillatelser og lovnader som er gitt ang. utvidelse av hotellets overnattingsmuligheter,trekkes tilbake av Tromsø kommune. Hvis Sommarøy Arctic hotells behov for ekstra overnattingsplasser ikke er større enn at de kan basere seg på at noen «frivillig» vil leie ut hytta si til hotellformål, bortfaller hele begrunnelsen for ytterlig utbygging

Så kva bør eg og SV gjere i denne saka? Kor stor er mangelen på næringsareal? Kan den mangelen løysast andre stader i Sommarøy/Brensholm-området? Eg er tilbøyeleg til å vere samd med Hillesøy fiskarlag, men vil gjerne høyre gode argument.

Den andre saka gjeld ny brannordning for Tromsø. Denne saka handlar om korleis vi skal dimensjonere Brann og Redning. Kor mange folk treng dei, kva utstyr treng dei og kva trening treng dei? Dette er ei sak som eg synst det er vanskeleg å skulle meine veldig mykje om som lekmann. Eg er ingen ekspert på verken brann eller redning og må i utgangspunktet stø meg på det administrasjonen skriv. Men, eg veit jo at det er fristande å ta i litt når ein lagar slike planar. Det hadde sjølvsagt vore fint med ein ny skumbil, men er det fint å ha, eller heilt naudsynt. Det synst eg er vanskeleg å vite. Så dersom det blant lesarane mine skulle vere nokon som kan mykje om dette temaet så vil eg svært gjerne høyre meiningar, innspel og kommentarar.

 

Sakslista forøvrig er slik som dette:

Saksnr Tittel Saksdok Behandling Vedlegg
0033/18 PLAN 1873 – DETALJREGULERING FOR SOMMARØY HYTTEFELT – ENDELIG VEDTAK Fremlegg Beh (1) Vedlegg(12)
0034/18 BRANNORDNING FOR TROMSØ KOMMUNE Fremlegg Beh (3) Vedlegg(3)
0035/18 MILJØMILLIONEN 2018- NYE KRITERIER FOR TILDELING AV MIDLER Fremlegg Vedlegg(2)
0036/18 ÅRSMELDING 2017 TROMSØ KOMMUNE Fremlegg Beh (6) Vedlegg(1)

Vil du få beskjed neste gong eg skriv på denne bloggen?

Skriv inn epostadressa di og trykk abonner

Standard