Kanskje kan det vere mogleg for kommunalt tilsette å ha kontoret sitt på Tromvik skole heller enn på Rådhuset?

Kan vi desentralisere kommunale arbeidsplassar?

Tromsø er ein stor kommune. Vi har mange viktige bygder utanfor byen som kunne trengt fleire arbeidsplassar og meir folk. Eg har tenkt ein del på om vi kunne lagt fleire kommunale arbeidsplassar utanfor Tromsø sentrum.

Du kan òg lese Nordlys sin artikkel om saka her.

Det er jo sjølvsagt mest aktuelt for dei som ikkje jobbar direkte mot brukarar. Lærarar og barnehagepersonell må jo vere der ungane er, akkurat som helsepersonellet må vere der pasientane er. Men koronakrisa har vist oss at det er ein god del tilsette i Tromsø kommune som kan gjere arbeidet sitt utan å vere på Rådhuset.

Eg har derfor lagt fram eit privat forslag for å sjå om vi kan gjere noko med dette. Forslaget skal opp i formannskapet 5. januar og er er slik:

Desentralisering av kommunale arbeidsplassar

I Tromsø er det ganske mange tilsette som utfører hovudvekta av arbeidet sitt ved ein datamaskin og som dermed ikkje må vere ved ein spesifikk kontorpult for å gjere jobben sin. Koronaperioden har og lært oss at svært mykje samhandling kan løysast gjennom bruk av ulike digitale plattformar.

Vi veit og at det er dyrt å leige eller ha kontorplassar i Tromsø sentrum. Det er og slik at kommunen har bygg i ulike bygder som Lakselvbukt, Sjursnes, Tromvik og Sommarøy. Det kan vere skolar, helsebygg eller andre ting. Det er ikkje alltid desse bygga er fullt utnytta.

Det betyr at det anten kan vere kontor tilgjengeleg eller ganske enkelt kan gjerast om til brukbare kontor. Det betyr at kommunen kan tilby kontoransatte å ha sin arbeidsplass andre stader enn ved Rådhuset i Tromsø sentrum.

Det bør derfor vere mogleg for kommunen å tilby folk som i dag er tilsett i kommunen å jobbe fast andre stader enn på Rådhuset, men ikkje minst bør det vere mogleg å tilby dette til alle nyansatte i kommunen. Formålet med dette forslaget er å bidra til å styrke bygdene i Tromsø kommune gjennom å bidra til stabile arbeidsplassar.

Forslag til vedtak:

Kommunestyret ber administrasjonen utgreie kvar det finst eller enkelt kan gjerast tilgjengeleg kontor utanfor rådhuset og korleis ein kan legge til rette for at kontoransatte kan ha sin daglege arbeidsplass utanfor Rådhuset. Saka skal leggast fram for kommunestyret innan juli 2021.

Eg håper dette kan vere eit bidrag til at fleire kan slå seg ned utanfor sentrum. Eg gler meg til å sjå kva utgreiinga finn ut og satsar på at det blir fleirtal for dette i kommunestyret.

Eg vil gjerne høyre kva du tenkjer.

This Post Has 4 Comments

  1. Gerd Bjørhovde

    Hei Pål Julius, Jeg synes dette er gode tanker, og ideer, men skulle ønske du samtidig også kunne fremheve hvordan f.eks. det å opprettholde bo- og servicesentrene/-tilbudene til eldre med de arbeidsplassene de medfører også bør være en viktig del av den tenkinga. Da kunne kommunen slutte å komme med forslag om nedlegging av distriktsbarnehager og -skoler — det ville være fint! Hilsen Gerd

  2. Jørn Vegard

    Jeg synes dette er et godt forslag.
    Det bør også sees i en større helhet og kanskje også målrettet, f.eks hvordan få en yngre og større befolkning i grend x (Sjursnes, Lakselvbukt, Tromvik, Skittenelv, Oldervik, etc.).
    Da må man f.eks forsikre eksistensen/bevilgninger til skole, barnehage, helsebygg, bibliotek, o.l. i 5-10 år.
    Og administrasjonen kan ikke «true» med å legge ned skolen, barnehagen og/eller sykehjem annethvert år.