Categories
Kommunepolitikk Politikk

Årets første kommunestyremøte

Onsdag 27. januar brakar det laus med årets første kommunestyremøte. Eller, kanskje blir det feil å seie brakar, for det er ikkje så mange saker det kjem til å bli bråk av. Spør om eller kommenter gjerne sakene

Eg skriv dette før gruppemøtet i SV, partiet kan ende på andre standpunkt enn det eg gjev uttrykk for her. Eg kan og endre meining etter diskusjon og innspel.

Reguleringsplan for Ringvegen 449

Vi skal starte med to reguleringssaker. Det gjeld Ringvegen i Hamna og Tindvegen i Tromsdalen. I Hamna blir det lagt til rette for 25 ny bueiningar. På kartet så viser dei gule områda kvar det skal byggast.

Vi har vore opptatt av å sikre tilgang til fjæra. Det ser ut til å vere i orden, så eg reknar med at denne blir vedtatt.

Saksframlegget finn du her.

Reguleringsplan for Tindvegen 17/930

I Tindvegen skal vi legge til rette for bygging av kommunale bustader. Det vil bli fleire bustader enn det er no, og området vil bli tilrettelagt med leikeplass.

Delar av byggeområdet strekk seg inn i eit område der det kan vere kvikkleire. Det må sjølvsagt handterast på ein skikkeleg måte.

I kartet er byggeområdet i stripa rosa og gult. Det er regulering for bustader/offentleg tenesteyting. Det grønne er leikeområde og det grå er veggrunn.

Heile saksframlegget finn du her.

Lære av Tromsøbadet

Vi skal gjennom ei sak der vi ser korleis vi kan lære av prosessen med Tromsøbadet så vi ikkje får tilsvarande overforbruk i framtida. Kommunedirektøren skriv i saksframlegget:

«Når det gjelder retningslinjer for utredning og analyser i tidligfasen av et investeringsprosjekt har kommunen i dag ikke godt nok system, slik kommunedirektøren ser det. Blant annet uklar struktur på bestillerkompetansen i de ulike avdelingene, samt en utydelig prosess for gevinstrealisering og prioritering av behov fremstår som utfordringer. God bestillerkompetanse er en viktig suksessfaktor for å lykkes med tidligfase prosjektutvikling og ikke minst treffe på et tiltak som er til det beste for kommunen, de tiltenkte brukerne og som skaper mest mulig verdiskapning.»

I denne saka legg vi til rette for å få på plass rutiner og regelverk for framtidige prosjekt.

Heile saksframlegget finn du her.

Retting av budsjettet

Då vi vedtok budsjettet for 2021 tilførte vi ti millionar til kultursektoren. Men vi glømte å regulere ned prisveksten for skolepengane på kulturskolen. I denne saka rettar vi opp feilen slik at prisauken blir i tråd med pris- og kostnadsveksten i samfunnet på 2,7% i staden for 12,7%. I tillegg rettar vi opp nokre andre småfeil i budsjettet.

Heile saksframlegget finn du her.

Kommunal garanti til TRINT

Tromsø Internasjonale skole (TRINT) må flytte frå der dei er i dag. I samband med den flyttinga kjem vi til å gje ein kommunal garanti for lån på 34 millionar kroner. Det sikrar at TRINT får lån og gode betingelsar på lånet.

Heile saksframlegget finn du her.

Kjøp av «Slottet»

Kjøp av «Slottet» frå Tromsø kommunale pensjonskasse har det vore ein del diskusjon om. Det er underleg at saka kjem opp sånn rett etter at budsjettet er vedtatt utan at saka var omtalt der. Det er og ein del saker i tilknytting til kjøpet som er litt for uavklart. Der må vi tenke heilt fram til kommunestyremøtet for å finne ut kva vi gjer.

Heile saksframlegget finn du her.

Distriktsarbeidsplassar

Eg har levert inn eit såkalla «Privat forslag». Private forslag er når kommunestyrerepresentantar kjem med eigne saker som ikkje går gjennom administrasjonen. Denne gongen foreslår eg at der kommunen har ledige lokaler i distrikta i Tromsø skal vi tilby folk som vil, og ellers ville måtte pendla langt å ha kontor lokalt.

Du kan lese meir om dette forslaget her.

Utbyggingsprogrammet

Der kom denne saka fykande inn på sakslista. Eg lurte litt på kor den var blitt av. Uansett, denne saka handlar først og fremst om kvar vi skal bygge ut kommunal infrastruktur framover. Det legg sjølvsagt og ein del føringar bustadbygging framover. Det er og føringar på at det må vere skolekapasitet der det skal byggast ut. Vi har vore opptatt av å sikre at kommunale bygg til helse og omsorg ligg inne i planen. Det har vore ei sak i den offentlege diskusjonen om at det skulle vere ei grense på 2,5 km frå sentrum der all bustadbygginga skal vere. Det er ikkje korrekt.

Du kan lese heile saksframlegget her.

Avslutning

Det trur eg var dei viktigaste sakene. Heile sakslista finn du her.

Still gjerne spørsmål eller kommenter.

Redigert 21.01.21 klokka 1543 med tillegg om utbyggingsprogrammet.

Toppfoto: Tromsø kommune/Mark Ledingham

Categories
Kommunepolitikk

Kan vi desentralisere kommunale arbeidsplassar?

Tromsø er ein stor kommune. Vi har mange viktige bygder utanfor byen som kunne trengt fleire arbeidsplassar og meir folk. Eg har tenkt ein del på om vi kunne lagt fleire kommunale arbeidsplassar utanfor Tromsø sentrum.

Du kan òg lese Nordlys sin artikkel om saka her.

Det er jo sjølvsagt mest aktuelt for dei som ikkje jobbar direkte mot brukarar. Lærarar og barnehagepersonell må jo vere der ungane er, akkurat som helsepersonellet må vere der pasientane er. Men koronakrisa har vist oss at det er ein god del tilsette i Tromsø kommune som kan gjere arbeidet sitt utan å vere på Rådhuset.

Eg har derfor lagt fram eit privat forslag for å sjå om vi kan gjere noko med dette. Forslaget skal opp i formannskapet 5. januar og er er slik:

Desentralisering av kommunale arbeidsplassar

I Tromsø er det ganske mange tilsette som utfører hovudvekta av arbeidet sitt ved ein datamaskin og som dermed ikkje må vere ved ein spesifikk kontorpult for å gjere jobben sin. Koronaperioden har og lært oss at svært mykje samhandling kan løysast gjennom bruk av ulike digitale plattformar.

Vi veit og at det er dyrt å leige eller ha kontorplassar i Tromsø sentrum. Det er og slik at kommunen har bygg i ulike bygder som Lakselvbukt, Sjursnes, Tromvik og Sommarøy. Det kan vere skolar, helsebygg eller andre ting. Det er ikkje alltid desse bygga er fullt utnytta.

Det betyr at det anten kan vere kontor tilgjengeleg eller ganske enkelt kan gjerast om til brukbare kontor. Det betyr at kommunen kan tilby kontoransatte å ha sin arbeidsplass andre stader enn ved Rådhuset i Tromsø sentrum.

Det bør derfor vere mogleg for kommunen å tilby folk som i dag er tilsett i kommunen å jobbe fast andre stader enn på Rådhuset, men ikkje minst bør det vere mogleg å tilby dette til alle nyansatte i kommunen. Formålet med dette forslaget er å bidra til å styrke bygdene i Tromsø kommune gjennom å bidra til stabile arbeidsplassar.

Forslag til vedtak:

Kommunestyret ber administrasjonen utgreie kvar det finst eller enkelt kan gjerast tilgjengeleg kontor utanfor rådhuset og korleis ein kan legge til rette for at kontoransatte kan ha sin daglege arbeidsplass utanfor Rådhuset. Saka skal leggast fram for kommunestyret innan juli 2021.

Eg håper dette kan vere eit bidrag til at fleire kan slå seg ned utanfor sentrum. Eg gler meg til å sjå kva utgreiinga finn ut og satsar på at det blir fleirtal for dette i kommunestyret.

Categories
Arbeid og trygd Kommunepolitikk Politikk

SV jobbar for å bevare og utvikle arbeidsplassar i Tromsø

I Tromsø har vi no store utfordringar i næringslivet. Mange bedrifter slit med å komme seg gjennom dei neste månadene. Eg er særleg bekymra for ein del av bedriftene i reiseliv, servering og sørvis. Eg er redd for at regjeringa si hjelpepakke kjem for seint. Den vil ikkje hjelpe før i februar. Vi må sikre at bedriftene overlever fram til då.

Derfor har SV lagt inn eit forslag på Stortinget, som eg håper dei andre partia vil støtte, om at Innovasjon Norge skal kunne gje umiddelbar kontantstøtte til bedrifter som slit på grunn av koronanen. Det ville vore eit viktig tiltak for å sikre at bedriftene og arbeidsplassane i Tromsø kjem seg over kneika inntil regjeringa si hjelpepakke kan ta til å hjelpe.

Kommunen har begrensa moglegheiter til å bidra, men innafor dei tronge rammene vi har så gjer vi det vi kan. Vi har derfor bevilga ein million til Tromsø Sentrum as for å skape liv og røre i sentrum fram til jul. Det vil hjelpe mange av dei bedriftene som slit. Vi har i tillegg bevilga ein million som ei direkte hjelpepakke til bedrifter som slit. I denne ordninga kan bedriftene få 50 000 kroner som eit bidrag til å overleve. Dei 20 første som søker og oppfyller kriteria i ordninga vil få støtta.

Det er utfordrande for viktige næringar i Tromsø på grunn av koronaen. Men vi må ta til å tenke på tida etter koronaen. Korleis utviklar vi næringslivet i kommunen og sikrar gode arbeidsplassar til folk?

Ein del av det vi skal gjere er å opprette eit næringsutvikling selskap i Tromsø. Dette er noko mange andre kommunar har, men som Tromsø har mangla til no. Overskrifta vil vere arbeidsplassar og poenget med eit slikt selskap er å i større grad jobbe strategisk saman for å utvikle næringslivet i Tromsø. Vi må bli betre på å tiltrekke oss etableringar utanfrå, og til å legge til rette for nye bedrifter og utvikling av eksisterande bedrifter i Tromsø. Eg trur eit næringsutvikling selskap kan bli eit viktig verkty for Tromsøsamfunnet for å få dette til.

Categories
Internasjonalt Russland Troms og Tromsø USA

Trist atomvedtak i kommunestyret

Forsvaret har laga ein risikoanalyse av å ta mot reaktordrivne farty til Tromsø. Vi har fått tilgang til den sladda versjonen. Last den ned her om du vil lese. Det er ein god del som manglar, men det som står er interessant nok.

For det første erkjenner forsvaret at dei ikkje veit så mykje om reaktordrivne ubåtar:

Vidare skriv forsvaret at det ikkje er gjort berekningar for Grøtsund, vi baserer oss på berekningane for Haakonsvern i Bergen:

Basert på berekningane frå Haakonsvern får vi dette kartet for kva som vil skje ved ei alvorleg ulykke. Alvorleg er ikkje definert i rapporten:

Som vi ser ender store delar av Tromsøya opp i kategorien «Shelter» som eg reknar med betyr at ein må halde seg innomhus. Men kva dei ulike kategoriane betyr er heller ikkje definert i rapporten.

cGy er centigray som er eit mål på kor mykje stråling eit objekt har absorbert.

Sjansen for at det skal skje eit uhell med ein slik båt er veldig liten. Eg vil tru at terror er det som gjev størst fare for at noko skal skje. I rapporten er det meste som handlar om truslar sladda, men dette står igjen:

Med bakgrunn i at terror kanskje er den største trusselen i fredstid så forundrar det meg at ein ønsker denne typen fartøy til ei sivil hamn. Trygging og sikring av slike fartøy vil måtte bli ei stor oppgåve for det norske forvaret. Eg kan ikkje forstå anna enn at ei slik sikring ville blitt betre og enklare ved ei militær hamn som var til rettelagt for det.

Uansett konklusjonen i rapporten er grei og ikkje uventa:

Men på bakgrunn av dette, og med tilleggsrisikoen vi tar på oss i eit større strategisk spel så meiner eg det er uansvarleg å ta mot denne typen fartøy ved ei sivil hamn nært Tromsø by.

Atomvåpen

Dette er og basert på at ubåtane ikkje har atomvåpen om bord. Noreg sin regel (Bratteli-doktrinen) er at vi forventar at dei skal vere utan atomvåpen, men at vi ikkje spør. Den ubåttypen som det er mest sannsynleg kjem inn til Tromsø er båtar av Los Angeles klassen. Denne klassen ubåtar vil vanlegvis ikkje ha atomvåpen om bord. Men dei kan ha det. Dei har Tomahawk missil som kan bære stridshovud med atomvåpen. Los Angeles klassen er sakte i ferd med å bli erstatta av Virginia-klassen. Dette er og ein ubåt som hovudsakleg er tenkt til å jakte på andre ubåtar og skip, men det er betydeleg meir sannsynleg at dei har atomvåpen om bord.

Skulle det mot formodning dukke opp ein Ohio-klassebåt ved kai i Tromsø kan vi vere heilt sikre på at det er atomvåpen om bord og sannsynlegvis at båten har store problem. Dei ville nok ikkje kome til hamn her om ikkje det var tilfelle.

Vedtaket i kommunestyret

I mars 2019 gjorde kommunestyret eit svært godt vedtak. Då sa vi frå om at vi ikkje ønska reaktordrivne fartøy til hamn på Grøtsund. Dessverre gjekk kommunestyret delvis tilbake på dette i går. AP, Sp, V, Krf, H, Frp og NTB gjekk saman om dette forslaget:

  • Kommunestyret vil understreke at Tromsø kommunes primære anliggende er å trygge og sikre egne innbyggere. Tromsø kommune skal bidra til at befolkningen får nødvendig informasjon og kunnskap om aktiviteten ved Grøtsund havne- og industriområde.
  • Tromsø kommune er opptatt av å bidra positivt inn i forpliktelsene Norge har som medlem av forsvarsalliansen NATO og skal legge til rette for alliert tilstedeværelse i kommunen og i nordområdene.
  • Tromsø kommune skal sette i gang arbeidet med å få̊ på plass nødvendig beredskapsplanverk slik at allierte fartøyer kan anløpe Grøtsund havne- og industriområde. Arbeidet forutsetter at Forsvaret ferdigstiller ROS-analysen som skal ligge til grunn for beredskapsplanverket. Arbeidet med beredskapsplanverket skal gis høy prioritet.»

Det er jo særleg punkt to som er problematisk i denne saka. Men det er viktig å få med seg at kommunestyret ikkje sette til sides vedtaket frå mars 2019. Det er rett og slett litt usikkert kva som er kommunens si haldning akkurat no.

Frå SV si side var vi med på eit siste tilleggsforslag for å prøve å sikre at dei som bur langs vegen ut til Grøtsund ikkje skal bli skadelidande på grunn av auka trafikk. Det forslaget var slik:

Kommunestyret vil påpeke at reguleringsplanene for Grøtsund angir rekkefølgekrav som må være ivaretatt før området kan tas i bruk. I forbindelse med avtale om mottak av allierte fartøy må det avklares hvilke rekkefølgekrav som eventuelt utløses av aktiviteten, samt sikres at disse ivaretas.

Men til sjuande og sist er det departementet som avgjer om det skal tillatast anløp i hamna på Tønsnes. Anten gjennom loven eller enkeltvedtak. I så fall får vi berre gjere vårt beste for å sikre innbyggarane i Tromsø.

Categories
Ikkje politikk Troms og Tromsø

Ei perle i Tromsø

Det fine med å bu i Tromsø er at det er så utruleg mange perler her. Det er perler av fjell, pubar og bibliotek. Det er så mykje at vi av og til blir blenda. Men desto artigare er det å oppdage nye perler.

Eg har gått ein del i fjellet i Tromsø, men lite og ingenting i fjæra. Sjølv om eg eigentleg er ein grisetangens og strandkrabbens mann. Men her om dagen rusla eg til nordspissen også gjekk eg fjære heimover mot Mortensnes.

Og fjæra frå nordspissen til Hamna er jo rett og slett ei perle som ikkje eg hadde sett før, eller i alle fall ikkje hadde lagt merke til før.

Og dette er ganske midt i den største byen i Nord-Noreg